INSTRUCIÓNS PARA A TRAMITACIÓN DE CONSULTAS SOBRE CONVENIO COLECTIVO DE APLICACIÓN A UNHA EMPRESA OU CENTRO DE TRABALLO:

A través desta páxina web, pódese solicitar información sobre o convenio colectivo aplicable a unha empresa ou centro de traballo. Para iso, hai que encher debidamente o formulario de solicitude e dirixilo ao Consello Galego de Relacións Laborais a través de correo electrónico (convenios.cgrl@xunta.gal).

O órgano competente para resolver cun ditame as consultas sobre o convenio colectivo de aplicación nunha empresa ou centro de traballo é o Observatorio Galego de Negociación Colectiva do Consello Galego de Relacións Laborais. O ditame será gratuíto e terá carácter non vinculante tendo en conta a información e asesoramento prestado polo persoal cualificado do Consello Galego de Relacións Laborais.

Unha vez que se reciba o formulario e tras comprobar que está correctamente cuberto, o Consello Galego de Relacións Laborais remitirallo ás persoas que integran o Observatorio Galego de Negociación Colectiva – no seu caso- e convocarase unha xuntanza deste.

Nas consultas formuladas ante este organismo sobre ámbito funcional de convenios colectivos en orde á determinación do convenio de aplicación a unha empresa en función das súas actividades, a parte consultante deberá ter en conta con carácter previo a formular a consulta o seguinte:

• O Observatorio Galego de Negociación Colectiva non é un órgano de resposta inmediata sobre os convenios aplicables, senón, como o seu propio nome indica, consultivo e de estudo dos distintos interrogantes que poidan xurdir para a determinación do ámbito funcional do convenio a aplicar en función da actividade empresarial, o que implica non só o estudo previo da consulta formulada polo persoal cualificado do Consello senón ademais o seu posterior exame e aprobación na xuntanza do Observatorio Galego de Negociación Colectiva integrado por membros dos sindicatos e das organizacións empresariais máis representativas da nosa Comunidade Autónoma.
• As consultas presentadas ante este organismo requiren dunha fundamentación adecuada, o que esixe implicitamente un estudo previo por parte do consultante sobre a cuestión en particular así como a exposición dos razoamentos que fundamentan a consulta e que permitan argumentar a resposta, con indicación daqueles convenios sobre os que se formula a consulta en relación coa actividade da empresa ou sobre o descoñecemento destes, no seu caso.

Quen pode formular consultas sobre convenio colectivo de aplicación?

Estarán lexitimados para enviar o formulario debidamente cumprimentado:

• As organizacións sindicais e empresariais máis representativas de Galicia.
• As organizacións sindicais e empresariais que, en virtude da súa representatividade, acrediten interese lexítimo na consulta.
• Empresa (persoa física ou xurídica)
• O órgano de representación das persoas traballadoras.
• A persoa traballadora na empresa sen representación de persoal.

Requisitos para a tramitación das consultas formuladas.

Deberase achegar a seguinte documentación ou información pola parte consultante:

• Identificación da empresa ou entidade a que se refire a consulta: nome ou razón social, domicilio e teléfono e correo electrónico.
• Lexitimación do consultante conforme os criterios detallados nas instrucións.
• Obxecto social da empresa.
• Epígrafe ou epígrafes de actividade económica nos que a empresa se atope dada de alta a efectos do IAE e do CNAE.
• Relación de centros de traballo da empresa, con indicación da súa localización xeográfica, persoal (sen relación nominal de traballadores) e actividade concreta realizada.
• Descrición detallada da actividade desenvolvida pola empresa a que se refire a consulta, con indicación completa do seu proceso produtivo e das actividades desempeñadas polos seus traballadores. No caso de que se leve a cabo máis dunha actividade indicarase cal é a principal.
• Naqueles supostos nos que a empresa leve a cabo varias actividades susceptibles de ser encadradas no ámbito funcional de distintos convenios colectivos, a parte consultante deberá concretar se as distintas actividades se realizan de forma autónoma, con persoal, medios técnicos e materiais propios, ou se pola contra gardan entre elas unha relación de dependencia produtiva ou organizativa. Para estes efectos deberá sinalar o volume económico de cada unha delas, así como o número de traballadores empregados en cada actividade.
• Estrutura organizativa e características do seu persoal (clasificación profesional, relación de persoal existente-non se esixe relación nominal de traballadores senón postos de traballo, categorías, grupos ou niveis e número de traballadores en cada un deles-, funcións realizadas polos traballadores.)
• Identificación do Convenio Colectivo que a empresa, no seu caso, veña aplicando no momento da presentación da súa consulta. Se fosen varios, indicarase cales.
• Fundamentación e argumentación que motiva a consulta formulada, con indicación dos posibles convenios que puidesen resultar de aplicación e as dúbidas que respecto do seu ámbito de aplicación se formulan.
• Indicación sobre se existe en curso algunha reclamación xudicial en relación coa cuestión formulada, así como respecto de calquera outro asunto sobre o cal a consulta proposta puidese ter incidencia.
• Persoa, teléfono e correo electrónico de contacto.
• O escrito de consulta debe presentarse en documento debidamente asinado polo solicitante.